حلويات معتادة

هوا انتو نفعتو فالطبيخ الاول لما حتدورو عالحلويات

المهم ممكن اقولكو على ام على عشان بحبها

بس انا بعملها خفيفه شويه مش بحط فيها سمنه كتير زى بتاعت برا عشان انتو عارفين الرجيم بقا

تجيبو الجلاش وتقطعوه وتحطوه فصنيه كده لوحده وتحطوه فالفرن يتحمص كده ويحمر شويه من غير سمنه ولا حاجه بس اوعى تحرقيه منك ليها

بعد ما يحمر شويه وينشف طلعيه من الفرن

جيبى بقا القوالب الى حتحطيه فيها عشان تدخليه الفرن حطى يا ستى الجلاش المتحمص فالقوالب وتكونى محضره لبن مسخناه وحاطه عليه سكر محلياه كويس وزودى السكر شويه عشان الجلاش مش عليه سكر
تصبى اللبن فوق الجلاش تغطيه ويبقا فوقه بشويه صغيره كده وحطى المكسرات وبعدين غطى الوش بالقشطه

وعلى فكرة دقته مرة برا كانو حاطين عالوش كستر كان تحففففففففه وجربته طلع حلو

يبقا لو معندكيش قشطه حطى كستر لو بتعرفى تعمليه يعنى

المهم بقا بعد كده تروحى حطاها فالفرن شويه صغيره واول لما تغلى روحى حطاها تحت الشوايه بس متلزقيهاش فالشوايه عشان انا عرفاكى شاطرة وحتحرقيها

حطيها فاخر رف للبوتجاز من تحت وولعى الشوايه وتفضلى جمبها سامعه متتحركيش عنيكى عليها

لما الوش يحمر كويس طلعيها ودوقى بقا وقوليلى عكيتى ايه

حلويات الله الله سيبوني بقى اتفنن وابدع هنا معاكوا الخبيرة وتسالوا في الحلويات بقى ده يصح برضه

دانا ماورييش غير احكي لشوشو عالايميل على جمال وحلاوة الحلويات وطريقتها

وشوشو عامله احلى طاجن ام علي بس انا مشكلتي معاه بحب ازود المكسرات وجوز الهند فيه بس انا بعمله موش بالجلاش لا بعمله بالرقاق بحمصه برضه في الفرن واعمله عادي

بس بحاول مرة في الشهر بس عشان الريجيم لاني بمووووووووت فيه

حاقولكوا طريقه بقى سهله للكنافه

بصي نص كيلو الكنافه مثلا حاتحطيها في طبق كبير وتحطيلها تلات معالق كبيرة زيت وتفرفطيها شويه بعدينا تقسميها نصين والصنيه اللي حاتعملي فيها ادهنيها بسيط بالجوانب بتاعتها سمنة

وبعدين تحطي النص الاول وتعدي تكبسي برحة ايدك عليها قوي اضغطيها على قد ماتقدري وترشي بقى المكسرات وجوز الهند والزبيب ولو حابيين القشطة فيها برضه تتحط معاهم

وبعدين تضيفي النص التاني وتوزعيه بالتساوي وتعدي برضه تضغطي عليها قوي لحد ماتتضغط عالاخر

اوك حتاخدي 6 معالق سمنة كبيرة وتقدحيهم على النار وتروحي رشاها بالتساوي على الكنافه وهوا سخن ومقدوح ويا سلام على صوت الطشطشة

بس وتغطي الصنيه باي غطا وتدخليها الفرن بس خلي بالك بتعرفي سواها من تحت من الاجناب وخروشة الصنيه اما تهزيها بلاش خيابة وتنحوا قدام التلفزيون وتنسوا الصنيه

المهم اما تتحمر ولونها يبقى بني فاتح من الجوانب تجيبي غطا اكبر من الصنية شوية وتروحي بشطارة كده وانتي مامنة نفسك من اللسع والحريق تقلبيها عالغطا وبصنعة شطارة برضه ترجعيها الصنيه تاني عاوش الني وتتغطا برضه لحد اما الناحيه التانيه تتحمر برضه تعملي الشربات اللي هوا عباره عن 1 كباية ماية + 2 كاباية سكر اول اما يغلوا تعصري عليها نص ليمونة وتسيبيها تاخدلها ثواني وتطفي عليها بعد ماتطفي تروحي حاطة باكو الفانيليا

بس وتطلعي الصينية من الفرن بعد اما الوش التاني يتحمر وتتسقي بالشربات ويكون الاتنين سخنين وبالهنا والشفا بقى

حظا سعيدا ان شاء الله في الحلويات يارب

بكرة اقولكوا حاجه تانيه